काठमाडौं, १० सेप्टेम्बर — नेपालमा पछिल्लो समय विकसित सामाजिक सञ्जाल नियमनसम्बन्धी विवाद र त्यसपछि भएको जनप्रदर्शनलाई लिएर चीनले प्रतिक्रिया जनाएको छ। चिनियाँ विदेश मन्त्रालयका प्रवक्ता लिन जियानले बुधबार आयोजित नियमित पत्रकार सम्मेलनमा पत्रकारले उठाएका प्रश्नहरूको जवाफ दिँदै नेपाललाई आन्तरिक मामिला व्यवस्थापन गर्न सक्ने क्षमतावान राष्ट्रको रूपमा उल्लेख गरेका छन्।
उनले भने, “हामी विश्वास गर्छौं कि नेपालका सबै पक्ष आन्तरिक मामिलाहरूलाई राम्रोसँग व्यवस्थापन गर्न सक्षम छन्।” उनले नेपालमा चाँडै सामाजिक व्यवस्था र राष्ट्रिय स्थिरता पुनर्स्थापित हुने अपेक्षा चीनले गरेको स्पष्ट पारे।
प्रवक्ता जियानका अनुसार हालका प्रदर्शनहरूपछि चीनको विदेश मन्त्रालय र काठमाडौंस्थित चिनियाँ दूतावासले कन्सुलर सुरक्षा संयन्त्र सक्रिय पारेका छन्। चिनियाँ नागरिक र संस्थाहरूको सुरक्षाका लागि आवश्यक सतर्कता अपनाउन आग्रह गरिएको पनि उनले जानकारी दिए।
नेपालमा सरकारले सामाजिक सञ्जाल नियमन गर्ने भन्दै लोकप्रिय प्लेटफर्महरू—फेसबुक, युट्युब, एक्स (ट्विटर)—अवरुद्ध गरेपछि देशव्यापी विरोध चर्किएको थियो। यसै सन्दर्भमा काठमाडौंमा भएको विरोध प्रदर्शनमा सुरक्षाकर्मीले गोली चलाउँदा दर्जनौंको मृत्यु र कैयौं घाइते भएका थिए। त्यसपछि सरकारले सामाजिक सञ्जालमाथिको प्रतिबन्ध हटाएको छ भने घटनाको छानबिन गर्न उच्चस्तरीय समिति गठन गरिएको छ।
चीनले विगतमा पनि नेपालका आन्तरिक मामिलामा हस्तक्षेप नगर्ने नीतिमा प्रतिबद्धता जनाउँदै आएको छ। पछिल्लो प्रतिक्रिया पनि त्यही नीतिको निरन्तरता भएको बुझिएको छ।
About the Author
